إزاي أتعامل مع شخصية سامة مضطر إني أشوفها يوميًا زي الأب، الأم، الزوج، المدير

بقلم -دكتوره نسرين صلاح
أولاً لازم نبقي عارفين إن الشخص السام هو شخص مش بيتعامل بالمنطق فا مش هينفع معاه الاقناع

تاني حاجة الشخص السام هو شخص عنده مشاكل داخلية كبيرة مش مدركها فبالتالي مش بيعترف بيها
زي لما نشوف أب وأم بيتعاملو مع أولادهم بطريقة سامة ومنبقاش فاهمين ازاي ده مش بيتعارض مع حبهم ليهم!

طيب مين هو الشخص السام ؟
الشخص السام هو الي بيجذب منك التعاطف طول الوقت
بيحتاج تكون شبه توقعاته و إلا هيقلل منك ويشك فيك
هيختار التسلط للتعامل معاك ديماً
هيحاول يفرض رأيه عليك بطرق كتير
هيحسسك ديماً أنك مش إنسان جيد
هيختار اللوم لما تحكيله عن مشكلة ليك
هيتوقع ليك الفشل لو هتبدأ شيء جديد
هيفرض عليك تلبيه احتياجاته
ممكن يأذيك لو فكرت تخرج من دايرته

✨ ازاي نتعامل مع شخص سام مضطرين نتعامل معاه؟

– ما تحكيش عن مشاكلك قدامه لأنه هيضخمها ليك او هيلومك عليها أو هيحاول يحسسك أنه فاهم أكتر منك
– حاول انك تتحكم في مسار الحديث بمعني أن لما الحديث يتوجه للوم و شكوي أو مقارنة أنهي الحديث وغير الموضوع أو عبر عن رغبتك في التوقف عن الكلام
– حط نيه داخلية إنك مش هتتأثر بالشخص ده
-لو هو بيحكيلك مشكلة و بيوجهلك طاقه سلبية حاول ما تقومش بالاصغاء يعني ما تسمعش بمشاعرك و كل حاجة فيك حاول تفكر في حاجات تانية بعيد عن كلامه

✨ طريقة الحائط ✨

طريقة فعالة جداً في التعامل مش الاشخاص اللي ما بنقدرش نتجنب التعامل معاهم الطريقة دي بتخلي الشخص السام يفقد اهتمامه بيك مع الوقت لو اتدربت عليها واستخدمتها

أول وأهم حاجة هي إختيار السكوت (الشخص السام بيتغذي علي أنه يشدك للدرما والتفاعل معاه بشكل حاد)
في الوقت ده انت تقدر تجرده من سلاحه باختيارك للسكوت والسيطرة علي نفسك

ما تبصش في عينه مباشرة ولو مضطر خلي نظراتك عند مناطق تانية زي كتفه أو جبهته لأن النظر ف عينه في الوقت ده هيحفز عندك الحاجة للرد أو الغضب

جاوب علي اسئلته إجابات روتينية جداً وقصيرة وسيطر علي لغة جسدك

ما تستخدمش معاه التبرير أو الدفاع عن نفسك ولو حاول إهانتك خلي ردك زي (ده رأيك، مش هلومك على طريقة تفكيرك)

مع الوقت الشخص السام هيفقد شغفه بالاحتكاك بيك وهيدور علي حد تاني يشبعله احتياجه في التعاطف أو تقبل الدراما منه
ماتلومش نفسك علي استبعاد الشخص السام من مشاريعك أو حياتك الخاصه لإن طبيعي يكون ليك شخصيتك المستقلة ودرجة نضجك وأفكارك اللي ما ينفعش حد يكون له تأثير سلبي عليها 👌