زمن الترندحين يتحول المخالف إلى بطل أتمنى آرائكم فى التعليقات
زمن الترندحين يتحول المخالف إلى بطل أتمنى آرائكم فى التعليقات
- Advertisement -
كتبت د/ هبه الجزار
-- Advertisement --
في زمن اختلطت فيه المعايير لم يعد الخطأ يدان بل يسوّق له.
أصبحنا نرى المخالف يقدم كضحية والمتعدي على القانون يتحول فجأة إلى بطل شعبي لمجرد أنه أشعل مشهدا يجذب التعاطف ويكسب مشاهدات.
قضية الكشك الأخيرة ليست قصة إنسانية كما يحاول البعض تصويرها بل نموذج واضح للتلاعب بالعواطف.
نحن لا نتحدث عن شخص اتظلم فجأة بل عن مخالفة مستمرة منذ سنوات كشك بدون ترخيص وقرارات إزالة صادرة من 2014 وإنذارات متكررة من جهات رسمية يعني الموضوع مش غلطة يوم ولا سوء تفاهم ده إصرار على كسر القانون.
الأدهى من كده؟
لما تتحول المخالفة لمسرحية ويحرق كشكه بيده علشان يعمل شو كامل الأركان ويكسب تعاطف الناس
من إمتى بقى تدمير الممتلكات بقى بطولة؟
ومن إمتى الهروب من القانون بقى جدعنة؟
والأغرب إن الدولة ما سابتوش في الشارع زي ما البعض بيحاول يصور بل عرضت عليه بديل محترم محل بإيجار رمزي يعني كان قدامه حل قانوني واضح لكنه اختار الطريق الأسهل كسب الترند بدل ما يلتزم بالنظام.
المشكلة مش في شخص واحد المشكلة في جمهور بيصفق
في ناس بقت مستعدة تدافع عن أي خطأ طالما عليه كاميرا ودموع وموسيقى حزينة.
وده أخطر بكتير من المخالفة نفسها لأننا كده بنبعث رسالة صريحة:
اكسر القانون وهتاخد تعاطف أكتر
خلينا نسأل بوضوح:
هل لو كل واحد خالف وبعدين عمل مشهد درامي هنقف معاه؟
ولا القانون بقى بيتطبق بس على اللي ما عندوش ترند؟
الحقيقة اللي ناس كتير مش عايزة تقولها:
التعاطف في الحالة دي مش إنسانية ده تشجيع على الفوضى.
وتلميع الغلط عمره ما هيخليه صح.
القانون مش وجهة نظر
والالتزام مش اختيار.
واللي يقرر يخالف لازم يتحمل النتيجة من غير تمثيل ومن غير استعطاف.
كفاية بقى صناعة أبطال وهميين
لأن البطل الحقيقي مش اللي يكسر القانون ويولع في كشكه
البطل هو اللي يلتزم حتى لو محدش صفق له
وفي النهاية ده رأيي وتحليلي للموقف لكن الأهم عندي أسمعكم:
شايفين إني على صواب ولا شايفين إن في زاوية تانية أنا مش واخدة بالي منها؟
مستنية ارائكم بكل وضوح في التعليقات.
-- Advertisement --
