خالى الابنودى انا جايلك طالب قربك جايلك هنا أكلمك أمام قبرك

حسام هواش يكتب
خالى الأبنودى………
خالى الابنودى انا جايلك طالب قربك
جايلك هنا أكلمك أمام قبرك
هتسمعنى وهتفهمنى انا حاسك
وجاى بالرحمة أدعيلك وانا هنا جنبك
شايفك واقف قصاد عينى هنا شايفك
شايف صورتك واحساسك وملامحك
وجاى أطلب انا منك أكون ابنك
وآخد منك ولو نقطة من بحرك
وجاى أشرب من قلمك ومن فكرك
عايز أعيش مع ملامحك ومع صورتك
وأطلب القرب منك وأعيش على نهجك
وياما قريت لك واتغنيت انا بشعرك
وياما أخدت من الاحساس اللى فى عيونك
وياما فهمت كلام قلته بشجونك
وياما كلام كتير صامت ورا دموعك
وياما الدهر غنالك فى شبابك وفى شيبتك
وبعد مماتك انا والله ما نسيتك
ببص لصورتك وبتعلم وبتغنى بألحانك
طالب أكون ابنك..مش انت قلت انا خالك؟!
مش انت كتبت قلت فى يوم ان احنا كلنا عيالك؟!
انا موافق…انا أطول أكون أبنودى؟!…..وأصلى صعيدى؟!
وتكون عمتى آمنة وأغنى كلامك؟!..والكل يقولى ياسيدى