كتب عيد صالح (لو مش عارف إحنا مين تعالى شوف المجد في عيون المصريين)

لو مش عارف إحنا مين، بص حوالينك… وشوف التاريخ بيحكي عننا من آلاف السنين.

إحنا المصريين، ولاد الحضارة اللي بنت الأهرامات، وكتبت على جدران المعابد حكايات المجد والحكمة. إحنا اللي صدّرنا العلم للعالم، من أيام إمحوتب، وسفننا كانت بتشق البحار قبل ما حد يعرف الملاحة.

إحنا المصريين اللي جذرنا في الأرض دي من أيام الفراعنة، وزرعناها قمح وقطن وأمل. إحنا اللي عدينا على كل المحن ووقفنا، يمكن انحنيت ظهورنا من التعب، لكن عمرها ما انكسرت.

إحنا اللي كل يوم بنصحى بدري على صوت الأذان وجرس الكنيسة، في مزيج فريد من التسامح والمحبة. اللي جيراننا يعرفوا إننا وقت الشدة بنكون سند، ووقت الفرح نغني ونرقص ونفرش القلوب قبل البيوت.

لو مش عارف إحنا مين، اسأل عننا في حرب أكتوبر، لما قمنا من تحت الركام، ورفعنا العلم على الأرض اللي حبيناها أكتر من نفسنا. إحنا اللي علمنا الدنيا معنى الكرامة، وإن الطين ممكن يطلع منه ذهب لو فيه إيد بتشتغل وقلب ما بيخافش.

إحنا اللي بنضحك في عز الوجع، ونهرج وإحنا شايلين هموم تقيلة، بس عمر الضحكة ما فارقت وشوشنا. إحنا اللي بنفتكر بعض في الدعاء، واللي أكلنا من نفس الطبق، حتى لو الدنيا قست علينا.

إحنا المصريين… شعب بيحب بلده من غير حساب، ويخاف عليها أكتر من نفسه. شعب لو اختلف يوم، بيلم نفسه تاني بسرعة، لأن اللي بيربطنا مش مجرد حدود، لكن دم، وأصل، وجينات حضارة عمرها ما ماتت.

فلو مش عارف إحنا مين… إحنا اللي لما بنحب، بنحب بصدق، ولما بنغضب، بنرجع نطيب بسرعة. إحنا المصريين… قلب طيب، وروح مرحة، وعقل مفكر، وصبر مالوش حدود.