حني للوقت اللي فات

مش من اللي بيحنوا للماضي
ولا من محبي الذكريات
والوقت لو فات مابتمناش رجوعه
ولا بيفرق معايا الجاي
أنا عايشة في الدنيا
نفسي في هدوء وفي ستر
لا فارق مين بيسأل ولا مين بعيد
أنا أملي إني أعيش سعيد
مش طالبة أكتر من رضاه
وعافية تامة لحين لقاه
أنا صعب جدًا أكون بحارب
مين أعلى ومين بقا أحسن
أنا شخص بيحب السلام
عارف بقوة إن الوحدة منبت ليه
وهتكون نهاية المطاف بيه
وإن الزيف اللي بيحاوطه
ها يجي اليوم ويظهر الحق
قصاد عينيه..
أنا شخص لو طال
هيكفن الماضي ويدفنه بإيديه
أنا صعب أبكي على اللي وجعوني
صعب أحن للي ماحبيتوش
صعب جدًا أنسى الأذية ولو سامحت
صعب أتعافى من رصاصة دخلتني
خرجت بروحي معاها
وأثرها جوايا مش بيلم ولا بيخف
مش سهل على قلبي يشوفني ببكي وبحرقة
وبنزف من دموعي الدم
ويقول لي:
“فرطي في حقك وسامحي”!
وادفني كل الوجع وبدون صوان للعزا
دا أنا قلبي اللي اتوجع
لو كنوز الدنيا جاتله
صعب جدًا هتداويه!!
صعب إني أحن ليه
صعب إني أشوفني بنزف
وأرجع وأقول لي “سامحي” واعذريه
سامحي وتاني عودي ليه!
حني للماضي واتمنيه
اشتاقي لذكرياتك وارجعي
حني للوقت اللي فات
أو حتى عودي وصلّحيه
هذا الفساد اللي أنتِ كارهة
ترجعي له أو حتى تفتكريه
لكن
أنا صعب جدًا أبكي على اللي وجعوني
ولو كل الكون غلطوني
صعب إني أعود لجرح
كل ما أحاول أداوي فيه
ينزف أكتر كأنه جديد
كأنه لسه وليد.
ـــــــــــــــــــــ
رانيا إبراهيم خليفة