معرفش يداري جريمتُه! “بالعامية المصرية ” بقلم الشاعرة /حنان فاروق العجمي
معرفش يداري جريمتُه! "بالعامية المصرية " بقلم الشاعرة /حنان فاروق العجمي
- Advertisement -
ضيعتني ما انتَ اللي بإيدَك بعتني
وفي عز أماني فزعتني
وكاس القسوة شَرَّبتني
كنت جَبَلَك العالي وبعزم قوتك هدمتني
ضَيَّعني ؟
لا مش حُبَّك ضَيَّعني
وَقعني؟
أيوا غباءك وَقعني
ذنبي؟
أيوا الذنب ذنبي
آمنت لثعلب غدر بي
عنيَّا؟
يا عيني عليها عنيَّا
بكت في وجودك طول لياليا
شافت في عنيك بلايا
صبرت وقالت محسودة على هنايا
يا سُخرية القدر!
آه مِ القلب اللي انفطر
ودموعي اللي نزلت مطر
والعِشرَة؟
عِشرة إيه مِ الأذى ربَّك سَتر
قال بيقول انقهر!!
خاطِر؟
خاطِر مين!
لأ وكمان لايمين
ومعاهم شوية حاسدين
وحَبة شماتة وحاقدين
فين؟
يااااه!! دا العُميْ شافوا
والخُرس نطقوا آمين
وراك أمِّنوا وباسوا الإيدين
وكَيِّلوا مِ العيب وعابوا
ويا دوب لَفِّيت بظهري غابوا
ما أنتَ عارف
آه والله مبخافش
تواجه تتجرَّأ؟
جبان مواجهة مَتقدَرش
قِرشَك؟
قِرشَك منزوع البرَكَة ومَبيُقعُدش
الحرام؟
لا مِ الحرام مَباكُلش
أَمَّا أنتَ شرِبت كتير
تِسيبُه؟
لا فات الأوان مَينفعش
أَغفِر؟
وأَغفِر ليه؟
طلعت كَدَّابة عنيه
وإديه يوم مُوتُه شاهدة عليه
لا ينطق شهادة ولا رَبِّي يغفر لِيه
بُعد؟
أَخَد الشر وراح
يعني لو كُنت بقِيت هرتاح
دا حتى الباب خَلَعُه!
ما هو مكانش عاجبُه وَضعُه
وطلع عندُه حق
كُنت كتيرة عليه
معدني الدهب خسارة فيه
حريق؟
النار مسكت فيه
وجلدُه اللي تغَيَّر لونُه مين يداوِيه
المرهم عشانُه بَطَّلت اشتريه
بيقول اتبطرت عَ العيشة
قال أيامُه وهناه!
وسعده إللي حرمني إياه؟
عارفة حكالكوا عن حالي معاه
براحتي نايمة ف عِز الظهر
خَدَم وحَشَم شمال ويمين
وجابر بخاطري جبر
-- Advertisement --
وكلامُه الحلو سقاني سنين
أَحِب؟
طبعًا أَحِب
أهلي والمجتمع والناس
وهُوَّ بناقص مِنُّه قُرب
صحيح فَقَدت كمان إحساس
الحنان أحيانًا ييجي مِ الغُرب
وقت الشدَّة بيتقاس
اللي معدَنُه نفيس أصلُه لُه أساس
افتح ورقك اكتب فِ كُرَّاس
أ -ب حاسِب مِ العقارب
سامة وكبيرهُم دَمَّك شارب
اللسعة؟
أيوا صحيح كانت جامدة
السم ف شرايين الجسم
عادي جُرم بأعصاب باردة
ثعبان لاحقِك فِ الحلم
فوقي من نومك آهو اتلَم
سبيل؟
رزق الهبل عَ المجانين
الصدقة مَتجوزش مِ الظالمين
لو بير مَبيخلصش ثوابُه مَيتقبلش
إيد تطعن وإيد تروي ف واحد مَيجتمعش
ميزان؟
ميزان العدل فوق ومسيرُه طالع ليه
الحكاية؟
طول ما أنا عايشة آهي عايشة
الحِيطَة بتاعتُه يا حرام بايشَة
مش هَتقدَري
ما قدرت خلاص صح النوم
ما قُلنا اتعلمت العُوم
لا أنتِ فاهمة ولا عارفة حاجة
عارفة قالها زمان واستغربت
أتاريه كان صادق في كلامُه
وإحساسي دَفنتُه وكَذِّبت
وأقدر أقول إنها حاجة واحدة صَدق فيها
ولا عُمر خَطر ببالي حقيقتُه الوحيدة
والصدمة وقعت على راسي شديدة
ما يقع إلا الشاطر
خُدي بالك دُنيتُه مش دايمالُه
وهتشهد عليه أفعالُه
رغم إن أمُّه كانت داعيالُه
صبرت على أبوه اللي طالعلُه
كان ظالم وعلى الظلم شاورلُه
واكفي القدرة على جنبها
الولد زي اللي ربَّاه
والعيال يا مِيلِة بختها
الفرع جزء من الأصل
والأصل حالُه مايل
غرقان فِ ذنوبُه
اكسر فرعُه وسيبُه بعيوبُه
ازرع في مكان تاني
من ظهر الفاسد يخلق عالم
دي قدرة ربك بحمِدُه
حفظني بعنايتُه
وفروعي بصبري رويتهُم
ودعيتُه وحدُه الجبار
يقويني على رعايتهُم
ونصيحة مني ليك
إوعى تغمض عنيك وجنبك حد
لو اتقلب شمالُه هيخونَك صدَّقني بجَد
أيوا الأمان اتقتل بفعل فاعل
كان في قتلُه فاجر
معرفش يداري جريمتُه
طلع كذاب وفوقها فاشل
ولسه باصصلي بعنيه!
تقولش سَلعوَّة طلع ليه!
آه والله الرعب مغَطِّيه
وسواد قلبُه عاميه
-- Advertisement --
