تحويشة العمر ..مع نعمة حسن

يارب توصل لقلبك قبل عقلك ..
حاول تفتح حصالة مع ربك .. مش عارف امتى تحتاجها انت أو اولادك .
افتح حصاله بموقف جدعنة .. بكلمة حق .. بكلمة تجبر بيهاخاطر .. مش بكلمة تكسر بيها الخاطر .. بكلمة تقوي مش تضعف .. بكلمة حلوة تمنح اللي قدامك الثقة مش تفقده الثقة .. بكلمة تحليك في عينه مش تكره فيك .. بكلمة مش تعليك وتوطيه بكلمة طيبة أصلها ثابت وباقي ..بفك كرب حد . بنصيحة في الله . باكرام ضيف بعزومه حلوة مهما كانت بسيطه بمشوار حلو تتفسحوا فيه خالي من اي مصلحة .. بمنع ضرر .. بمساعدة حد على خطوة نجاح.. برفع ظلم ..برد حق .. بطبطبه على باكي حزين .. بمساندة ضعيف .. بتفريج هم .. بمشاركة فرحه .. بوقت تسمع فيه فضفضة وحيد أو ضيق صدر مهموم .. بمشاركة حد لقمه معاك .. أو حتى بعزومة جار على طبق حلو عملته بايدك ..أو بقليل من مالك تراضي بيه محتاج .
الدين معاملة .. دينا مش عباده بس .
عبادتك دي انت بس اللي ح تاخد أجرها من غير ماغيرك يستفاد منها شيء .. دي عباده منقوصة وإنانية وخالية من الإنسانية .. العباده الحقيقية في جهاد نفسك لما تعامل الناس .. في جهاد نفسك لما تحسن معاملة الناس وما يقدروها وتقول أنا مش منتظر منهم أنا بعمل ده لوجه الله هي دي الحصالة الحقيقه انك تعامل الناس لرب الناس مش للناس ..
هي دي الحصالة اللي بتحوش فيها ثواب الدنيا واللي ممكن بيها يعوضك ربنا عن خذلان كتير في حياتك بحاجه كبيرة تفرحك وتسعد قلبك أو بيها يحفظك من قدر كان محتوم ولطف ربنا بالقدر ده ..
الدين مش انانيه تجحد الناس وتصلي وتحافظ على مظهر الدين من عبادات وتترك الأهم مجاهدة نفسك في تعاملك مع الناس في الله ولله ولو بابسط الاشياء جمعها واتركها في حصالة ربنا ح تزيد بعشر أمثالها والصغيرة ح تحسب عند الكريم كبيرة الدين معاملة مش عباده بس ..