حسام هواش يكتب ياااابنت حوا

بقلم ..حسام هواش ..

يابنت حوا دلينى وقوليلى انتى ايه غاوية
يابنت حوا ساعدينى وقولى على ايه ناوية
ياست الكل أرجوكى انا على حافة الهاوية
قوليلى ايه اللى يرضيكى وأنا هعمله فى ثانية
انا والله يفرحنى بس انى أشوفك راضية
هتفهمينى ياغالية..ولا عندى ومش فاضية
ياااااابنت حوا
ليه بره بيتك حلو المزاج رااااايق وفرفوشة
ولما ترجعى بيتك كأنك بيضة مغشوشة
وبره البيت كدا هادية وفى البيت تقلبى العيشة
مع أصحابك كدا رايقة ونعومتك ولا الريشة
وفى البيت زهقانة وتعبانة والشعر منكوشة
ياااااااابنت حوا
انا للحرب مش بعلن مش هاخد غلوة فى ايديكى
انا بس بتقرب وبتوسل أفهم ايه اللى يرضيكى
انا فى الدنيا متمرمط..وكله تحت رجليكى
وعايز أعيش ولو ثانية…شايف سعادة فى عنيكى
لكن أذية مش عايز …ولا بستفذ الشرور فيكى
ياااااابنت حوا
وعشق الغم ده فى دمك..وهو يبوس فى ايد أمك
عايز يعيش يومين مرتاح..تقوليله بعينك ياروح أمك
راجع شايل همووم الدنيا..وانتى تشيليه همك
ياشيخة ألعن ابو دمك؟..انا يعنى ناقص غمك؟
انا اللى الدنيا ظلمانى انا يعنى ناقص ظلمك؟!
يااااااابنت حوا
أعلنت الحرب على نفسى ومش خاااايف
ودى عمايلك وطبيعتك وانا شااااااايف
طب عايزة ايه من الراجل مش عاااارف
ياولاد آدم نيابة عنها أنا آسف
وليا رب يحمينى ومن أعمالها ينجينى