فيه جملة عظيمة بتقول :

 دكتورة مني ابو الخير

ان لو كان اهم هدف لقائد السفينة سلامتها .. يبقي هيخاف يحركها .. هيسيبها في الميناء للأبد ..

.. ساعات نحس اننا خايفين من كل حاجة .. خايفين نتكلم .. خايفين نواجه .. خايفين نطالب .. خايفين نبعد .. خايفين نعرف .. خايفين نفشل .. خايفين نتجرح .. خايفين نزعل ..
.. لحد ما حياتك تضيق عليك .. يبقي كل اللي بتدور عليه في اي موقف هو باب الهروب .. شوية و بتبقي دعواتك كلها ان اليوم يعدي .. يعدي و خلاص .. مش عايز منه حاجة .. حتي الخير مش عايزه .. انت عايزه يعدي بس .. بتبقي كتلة خوف ماشية بقوة الدفع ..

.. لحد ما تدرك في يوم ان خوفك بني سور .. فعلياً السور ده بعدك عن كل مخاوفك ولكنه كمان افقدك حياتك ..

.. و في يوم من الايام تضطرك الحياة انك تواجه غصب عنك .. و المفاجأة انك هتلاقي الموضوع طلع ابسط بكتير من اللي في خيالك .. ساعتها هتندم علي كل يوم استخبيت فيه .. لانك هتتأكد ان نص مخاوفك كانت اوهام و النص التاني انت اصلا تقدر عليه …

.. و في كل مرة هتقضي علي خوفك من حاجة حياتك هتوسع اكتر .. و هتحلو اكتر .. هتلاقي ورا كل باب كنت خايف منه هدية .. اولها صورتك اللي بتتحسن قدام نفسك و احساسك بالسيطرة علي حياتك ..

الفكرة مش انك ماتخافش .. خاف لان دي طبيعتنا .. و ماتأنبش نفسك علي خوفك .. بس اعمل اللي انت عايزه حتي و انت خايف