فضفضة مع (صابرين قنديل)

يعنى ايه عِشرة و مين الناس الحلوة دى ؟

العِشرة : هى ما يقع بين اثنين من تعامل بالقول أو الفعل .

فى مراحل حياتنا المختلفة فى ناس علاقتنا بيهم بتكون قريبة و مستمرة لفترة بشكل يومى .

أسرتنا مع الأب و الأم و الأخوات، أسرتنا بعد كده زوج و زوجة و أولاد، شغلنا اللى بنكون فيه لفترة أو طول نفس المكان طول العمر.

جيران ممكن يتغيروا بتغير السكن من وقت لتانى.

أصحاب المدرسة ، الجامعة ، العمل ، الميديا .

فى ناس منهم نتمنى نفضل معاهم و جنبهم و ناس تانية بنحاول نحط بنا و بينهم مسافات عشان نتجنب قربهم.

مش هتكلم عن الناس اللى عشرتهم صعبة …

لأنى بحب اتكلم عن كل إيجابى و ادعمه و لما نفهم و نحبه اكيد هنبعد بوعى عن عكسه و نتجنبه.

سمات صاحب العِشرة الحلوة اللى بيفضل له مكانة فى القلب طول حياته و بعدها.

– الوجه البشوش : اللى تبصله يطمنك و يحسسك دايمًا بالأمل

اللسان الحلو .. زى ما بنقول كلامه بينقط عسل و سكر يحلى مرارة اى موقف صعب و يهونه.

– رشيق فى حركته خفيف فى وجوده : عنده طاقة فى كل حركة بيعملها تحسسك بالطاقة المتجددة و فى نفس الوقت وجوده هادىء لا يسبب إزعاج و لا توتر

– التفاؤل : لهم هالة كلها طاقة تحسسنا الدنيا دايمًا فيها خير .المشكلة بالنسبة له فرصة للحركة مش التوقف، فرصة للابداع مش الاستسلام

– العطاء.. مش عايش لنفسه و مصالحه و بس، حاسس دايمًا بمشاعر اللى معاه حتى من غير ما يكلموا. يعمل اللى يسعدهم من قبل ما يفكروا فيه

– الامتنان… بيشكر ربنا كل يوم على اللى عنده و مش شاغل نفسه بالسعى وراء اللى ناقصه. بيسعد بكل شيىء غيره بيعمله له حتى لو بسيط.

لو فى حياتنا ناس فى سمات صاحب العِشرة الطيبة

أب، أم ، أخ ، زوج ، زوجة، ابن، ابنة، صديق ، جار ، مدير، زميل عمل ……

حافظ عليه … خلى تواصلك معاه قوى عشان يقويك

و لو عايزين نكون هذا النموذج نسعى لاكتساب سماته عشان الناس اللى بيتعاملوا معانا يقولوا علينا فى حياتنا و بعدها “هذا الشخص عِشرته حلوة أو متتعوضش”