فضفضة مع السفيرة نعمه حسن .

خليك رايق .. واستمتع بالنعم

عزيزي القاريء ..

اسمعني كويس ..

ياعزيزي .. طول ما جواك مش رايق ..

طول ما جواك موجوع .. مش مبسوط ..

عمر اللي حواليك ما يحسوا معاك لا براحة .. ولا بسعادة .. ولا انت ح تحس بيها ..

هونها ح تهون ..

وسيبها على الله..

هو عليم وحكيم .. ومدبر الأمور احسن مني ومنك .. دا ربنا طيب اوي يا ولاد والله . قرب بس انت منه واشكي له همك ووده قوله بحب اللي وجعك وادعيه بخشية وتضرع والله سمعك .. والله سمعك .. بس هو بيحب الدعاء .. ويحب عبده يتقرب له .. وكل ماتقرب له .. هو ح يقرب لك اكتر .. واكتر .. هو أقرب اليك من حبل الوريد .. هو حاسس بيك وح يطيب خاطرك .. ويطبطب عليك .. يراضيك .. يغسل همك .. ويحنن عليك . اوعى تسيبه وتروح لغيره اوعى .. غيره ده مالوش على نفسه سلطان .. دا انت وغيره ماشيين بستره .. انت وغيره ده مهما كانت قوته وجبروته وسلطانه ضعيف ومايقدر لك على شيء إلا بامره تعالى..

هو احن علينا من الكون كله واللي سخره عشانا ..

واتاكد .. وأكد قارئ العزيز أنه لو اجتمع أهل السماء وأهل الأرض على أن يضروك .. فلن يضروك إلا بشيء قد كتبه الله لك ..

ولو اجتمعوا أهل السما وأهل الأرض على أن ينفعوك .. فلن ينفعوك إلا بشيء قد كتبه الله لك .

فالكل ماشي بأمره هو..

بس اعرف دا واعمل بيه ح تلاقي قوة جت لك منين ماتعرفشي ..

ولا ح يهمك زيد .. ولا عبيد مها كانت مكانته لأن المكتوب مكتوب من عنده هو مش من عند اي حد..

فلا ح تخاف من الحد ده..

ولا ح تعمل له حساب لأن ببساطة حسابك عند الله وحده ورزقك في كل شيء عند الله وحده .

فيا ..عزيزي .. الخلاصة..

ثق في أن الخير جاي جاي لا محاله.. وان المر بيمر ..

والحلو برضوا ح يمر عليك..

وح تاخد نصيبك منه وغير منقوص ولا خردلة .. بس كله بوقت وبميعاد

والحكاية كلها إن اللي مقسمها هو اللي عارف الميعاد امتى .. وكل اللي عليك تصبر وما تستعجل ..وقوي ثقتك في الله ..

وخلي الإيمان بيه يملى قلبك بجد ومش كلام .. ثق في أنه عادل في كل شيء .. وقسمته لحقك في الحياه عادل ..عادل ..عادل وبكل دقة .

وبثقتك فيه دي بئه ..

ح تهدى نفسك ..وقلبك ..وروحك .. وترووووووق روقان ما بعده روقان وبثقتك في أنه موزع علينا الأرزاق في كل شيء بالتساوى..

محدش احسن من حد .

ح ترضى باللي قسمه ليك..

ف السعادة في الرضا..

وبالرضا ح تهدى نفسك..

وتشوف الجمال وتحسه..

وتحب الحياة.. والدنيا .. وكل شيء حواليك.

ح تحس الجمال في كل شيء .. وأقل شيء ..

ح تحسه وتستمتع بورده..

بفنجان شاى.. بسندويتش جبنه .. ح تحس بنعم ربنا الكتيرعليك حواليك وانت مش واخد بالك منها .. باحبابك ..بصحتك.. بجدران بيتك مهما كان بسيط .. بسريرك مهما كان بسيط .. بحمامك اللي بتقضي فيه حاجتك .. في ناس محرومه من ده كله .. في ناس بتنام في خيام ومحرومه منها .. في ناس بتقضي حاجتها في الخلا ..

ح تحس السعادة بالأمان لما تنام وتقفل بابك وانت مش خايف على أهلك وناسك .. بالأمان من خطر راعب قلبك وقالل راحتك وبتفكر ليل نهار تحمي نفسك منه ازاي .. بامنك في وطن خالي من حروب ترمي بناتك أو اخواتك أو امك أو اولادك في في بلاد غريبة يكونوا فيها عالة مهانين بلا مأوى لا قدر الله .. ح تحس بسعادة أن ليك وطن ٱمن مهما صعبت فيه الظروف وضاقت فيه الأرزاق ..وجار عليك الأهل والخلان ..أو خذلك فيه صديق أو حبيب .

بستر ربنا عليك لما الناس ماتحس بغلطة تقل منك وربنا يسترها عليك .. بموقف محرج كنت ح تتحط فيه وربنا يسترها عليك .. بخطر كنت ح تقع فيه وربنا يحميك منه .. من شر أي أن كان كان ح يحصل معاك وربنا نجاك منه .. حس بالنعم البسيطة .. اللي من كٰتر ما هي بين ادينا وبنمتلكها .. وتستخدمها بشكل دائم دون عناء فقدنا انها فعلا نعمه تستحق نستمتع بيها ونحسها ونشكر ربنا على فضلها .. وان يديمها ربنا علينا نعمه .. وبجد عاوز تعرف قيمتها بص على اللي محروم منها وتخيل نفسك لو اتحرمت منها ومابقت في حياتك ح تحس الحرمان الكبير وأهمية الاشياء مهما كانت بسيطه ..

هنا بس ح تحمد ربنا وتشكر فضله وترضا بكل النعم اللي حواليك وتوصل لسلام نفسي ماتهزه الأشياء .. صغرت ام كبرت .

كل ده فقط بالرضا .. وثقتك بالله .

ادام ربي عليكم نعمه .. وارخى عليكم ستره .

صباحكم خير وسعادة ..