فضفضة مع السفيرة نعمة حسن .

بصراحة مش كل لبسي براند .. لأن أنا البراند اللي بالبس وبطريقتي اللي يليق على ويناسبني حتى لو كان بسيط .. المهم البس ازاي ..

أنا اللي اخلي اللبس براند ..أنا البراند . يعني ايه تلبس البراند .. لمجرد أنه براند والكل متشعبط فيه ..

وليه تدفع في البراند كل اللي معاك .. ويمكن اكتر من راتب الشهر .. ليه هي خامته مصنوعة من خيوط دهب ..

ولا صاحب البراند نزل من السما ومجاش بعده

الموضة .. الشياكة

مش بأنك تشتري البراند عشان اسم .. عشان غالي .. عشان الناس تعرف انك بتشتري غالي وخلاص .

ياعزيزي ..

كفاية عقدة الخواجة ..

كفاية نقص .. كفاية سير في القطيع ..

احب اعرفك أن يكفيك انك تلبس شيء نظيف .. مكوي .. مرتب .. مناسب لشخصك .. مناسب للمناسبة

مشيتك .. حركتك ..ثقتك في نفسك ..شخصيتك .. طلتك ..

من الأخر ..

كل دول .. بكل بساطتهم ..ح يخلوك اشيك .. ح يخلوك أنيق اكتر وجذاب وملفت اكتر من غير اي براند ..

ياما ناس لابسه براند ولا تشوفهم .. ولا تحسهم .. ولا يلفتوا نظرك ..ولولا الملامة ينط في بقفاه في وشك عشان يعرفك أنه براند .

كون انت البراند .. كون انت الشخص اللي الناس تتمنى تلبس على طريقتك ..

انفرد بذوقك .. اتميز بشخصيتك وانت بتختار اللي يناسبها ويخليك انت محط أنظار واعجاب .. بحق .. خليك انت البراند اللي الناس تستوحى منك الأفكار في اللبس ..

ياعزيزي اللي ابتدع البراند دا انسان زيه زيك عنده فكره ساعدته الظروف على نشرها واستغلوها المروجين عشان يضحكوا بيها على الفقراء مش على الأغنياء..

على فكرة الأغنياء بجد مش بتفرق معاهم البراندات .. الأغنياء بجد بيلبسوا البسيط اللي يناسبهم مهمًا كان ولو رخيص بس شيك ومناسبهم .

كتير مننا وللاسف بيدور على اسم البراند ويلبسه وهو مش عارف انه وصل له بعد ما اتعرض في السيل مليون .. مره واترمى اكوام في الارض وبعد السيل رجع على الاستاند وارتفع سعره تاني وبعدها يشتريه بعد ما موضته بطلت ..وتبهدل في السيل ..وأوقات يكون مكتوب عليه عبارات مش متاسبه لذوقنا ولا مجتمعتا .. ولا حتى المناسبة اللي نزل فيها الموديل ونلبسه وخلاص وندفع فيه مبالغ .. والكل ماشي لابس يوني فورم مافيش تميز.. مافيش حد لابس بشكل مختلف ..

حتى مفهوم الموضه اتغير اصبحت الموضه يعني كله لابس زي كله ..

طب احس أنا أنك ذوقك مختلف ازاي .. طب أقول عليك انت لبسك مختلف وانيق ازاي .. فين لمستك انت .. وشخصك انت على اللبس ازاي اميز ذوقك اللي يخلني استوحى شيء جديد من لبسك انت ..

ياعزيزي اللي اخترع البراند انسان زي وزيك .. وبيفصل بقماش ممكن يكون في في السوق احسن منه مليون مرة .. وان اللي خيطه في مليون خياط شاطر ومبدع يقدر يصمم اي موديل انت تفكر فيه ..

بس احنا خلاص بطلنا ابداع .. بطلنا نبتكر .. احنا بقينا نقلد من غير ما نميز احنا فين ومين وايه ونقدر ولا مانقدر خلاص سدينا ودانا وعمينا عنينا وقفلنا على فكرنا وبطلنا نتذوق الجمال ونبدع فيه .

اياك تفتكر أنك لما تجيب براند كده انت ابن ناس .. أو غني ومقتدر ومن الطبقة المخملية .

لا حبيبي انت ابن ناس دي بسلوكك برقيك .. باختيارك الكلمات وتقديرك لمشاعر غيرك ابن ناس دي عمر البراند ما يعبر عنها ..

اصرارك على البراند من وجهة نظري أنك أجوف .. فاقد الثقة في نفسك وشخصك .. ومكانتك ..أو حاسس بالنقص الاجتماعي ..والمادي فبتكمله بلهثك على البراند .. ويمكن تكون مش لاقي تمنه.. أو بتفضل تشتريه عن انك تشتري دوا ..

أو أكله نفسك فيها .. وتجمع تمنه بالعافيه عشان تبان ابن ناس .. يكفي يكون عندك قطعة أو قطعتين توفقهم مع لبسك اللي تفضله وتحيه لايق عليك مش لازم كله يبئة براند ياعزيزي .. كل حاجه غلت والاسعار على مستوى العالم بقت جنون .. وخد بالك اووي لوعلى ولاد الناس ناس فعلا وشافوا البراند واخد عندك المساحة دي كلها حقيقي ح تكون محل سخرية واستهزاء كبير جدا لانهم لا بتفرق معاهم لابس ايه ولا بكام ولا انت مين اصلا ..

أنا بتكلم على ولاد الناس الحقيقين مش اللي انتشروا اليومين دول جاتهم الفلوس فجأة ونقلتهم من القاع للسطح لا أنا ..

أنا أقصد ولاد الناس المحترمين من الجذور واللي الفلوس عادي عندهم جت ولا راحت .

وعقدة الخواجة بئة دي ارجع بيها للفنانة الراحلة ليلى مراد واللي اتشرفت شانيل تصمم لها فستان يكون دعاية لشانيل

ياعزيزي البراندات دي أكبر مقلب شربه العالم التالت الغلبان اللي عنده عقدة الخواجه..وحتى بعض الأغنياء شربوه .

بدليل النهارده أي حد يشتهر هوووب يعمل براند يستغل بيه شهرته ولازم يكون غالي جدا عشان الناس تتلحس عليه ويدفعوا فيه دم قلبهم .. زي هاديه غالب .. هدى بيوتي اهم بقوا براند يعني الموضوع مش اعجاز دا بس هطل ولعب بالعقول التافهه .

والدليل التاني على ان البراند أكبر خدعة انه كبرى البراندات دي بتصنع منتجاتها في البلدان اللي العماله عندهم ارخص واقل رواتب بتتصنع في الهند بعمالة هندية وبنجالة

يعني لا بريطاني ولا أمريكي ولا ألماني ..

كله ع الرخيص ويبيعولك بالغالي ليه عشان براند ..

تكلف اهلك او نفسك الغالي وتضيق على عشيتكم وتتخنقوا وتتحرموا عشان تجيب وهم اسمه البراند وباقي الايام تصرخوا على غلاء الاسعار .. غلاء العيش . . غلاء الزيت ..

غلاء الدوا

غلاء كل حاجه ..

والغريب بئة ان غلاء البراند في تشيرت واحد بيعدي راتب موظف كادح .. والاغرب ان تلاقي ابن الغلبان وابن المتغرب هو اللي حريص على انه يلبس البراند ويخنق اهله..

بطلوا بئة وعيشوا عيشة اهاليكم وما تكلفوهم اكتر من طاقتهم ولما تلاقي ماما ولا خالتك بتندب على الغلا وانت جالس تطبل وتظيط معاهم ماتنساش تبص على تي شيرتك بكام انت ولا اختك ولا الكوتشي اللي شبحت أهلك عشان يجبوه بكام ولو انت صاحب بيت ياليت تفوق من وهم البراند عشان بيتك اولى بفلوسه عشان ساعتها مش ح تندب ع الغلا ..

اتمنا اكون وصلت لذوقك الراقي في فهم مقصدي وتطبيقه على ذوقك ورقيك في اللبس .. فأنت ذواق اكتر من صاحب البراند .. انت تقدر .. انت براند مش تلبس براند .