بكتب يا بكرة وصيتي

نص “بكتب يا بكرة وصيتي”..
يمكن يا بكرة تشيل لي ذكرى
في قلب أمي ماتتمحيش
يا بكرة جاي
بس اللي جايز
إني معاك ماجيش
بتمنى لو فعلا مشيت
ماتنسيش
يمكن يا بكرة تهل
وأبقى في مكان تاني
مرتاحة من ذكريات تعباني
جايز يا بكرة هتيجي
والكل فيك ينساني
بتمنى تبقى فاكرني
وتهل في قلوبهم بصورتي من تاني
جايز يا بكرة يكون اللقا فيك
أبص في عينها واحضنها من تاني
جايز يكون الجمع بلا فرقة
ويرتاح القلب من الحرقة
وتنطفي ناره
جايز معاك تبتدي ذكريات تانية
وأعيش فرحانة فيك كل ثانية
بإني وياها من تاني
بإني شايفاها قدامي
ولمساها بإيديا بوجودها حواليّ
بكتب يا بكرة وصيتي
علشان تشيلها جوه قلبك مش بس عينك
طبطب عليها وإياك تكون قاسي
في حضنك داويها بإني رحت ومش ناسي
لا أهلي ولا ناسي
وامسح على قلبها الطاهر
بإن قلبي في رحمته مغمور
وابعت سلامي لصحبتي
لو فضلوا ونسي في وحدتي
وقول لهم بإني محتاج قلوبهم تفتكرني
ولو يوم أذيتهم يدعوا ليّ
إن الذنوب تتغفرلي
واطلب منهم سماحي
يا بكرة هِل بكل خير وياك
إوعاك تيجي بأذى لقلوبنا معاك
افتح سبيل للفضفضة بيننا
يمكن تكون لي خير الرفاق
يمكن أشيل لك جوه قلبي
ذكرى بك مانسهاش
يا بكرة هل وأنت شايل ويا منك
لقلب أمي فرحة حلوة ماتئذيهاش.
*****
رانيا إبراهيم خليفة.