اللايف كوتش أحمد كمال يكتب مش لازم تجري طول الوقت

بقلم اللايف كوتش /احمد كمال

إحنا تعبنا.
مش من الشغل بس
تعبنا من الإحساس إننا لازم نثبت نفسنا كل يوم
لازم ننجح.
لازم نكبر.
لازم نعمل أكتر
لازم نبقى أحسن من امبارح ومن غيرنا
بس إمتى آخر مرة ارتحت
من غير إحساس بالذنب
إمتى قعدت ساكت
من غير ما تحس إنك متأخر
الحياة مش اختبار يومي
مش لازم كل يوم يبقى إنجاز.
في أيام عادية…
وهي العادي ده نعمة.
مش كل خطوة بطيئة معناها إنك فاشل.
ومش كل وقفة معناها إنك بتقع
يمكن أنت مش محتاج تجري أسرع…
يمكن محتاج تهدى شوية
وتطبطب على نفسك بدل ما تضغطها.
مش عيب تبقى لسه في الطريق
ومش عيب تتعب
ومش عيب تقول:
( أنا محتاج أهدى )
يمكن القيمة الحقيقية
مش في اللي عملته…
لكن في إنك لسه بتحاول
رغم كل اللي جواك
خد نفس
إنت مش متأخر
إنت بس إنسان