الحب ،الضمان ،والأمان بقلم / أماني حسن

الحب!! أجمل حاجة في الحياة إنك تلاقي حد يحبك حب مطلق ، يحبك بدون مقابل يحبك بدون مصلحه ، يحبك لنفسك زي ما هي ، يحبك حب التقبل التام ، يحبك بمميزاتك وبعيوبك ، يحبلك السعادة علطوول ، يحبلك الفرحة دايما ، يحب يشوفك مبسووط ، مش عايز منك حاجة غير أنك تكون في أحسن حالاتك ومبسوط ، قلبه بيطمن بوجودك ، قلبه بيحس بالهدووء جنبك ، بيبعد بيك عن صخب الحياة ، حاطك في كفة والعالم كله في كفة تانيه ، مش عايز من الدنيا غيرك ، داخل في أدق تفاصيل حياتك ، مش بتحلا الحياة غير بيك ، إذا أختفيت يدور عليك ، إذا بعدت يقرب منك ، إذا زعلت يخاف على زعلك ، إذا أتضايقت يخفف عنك ، إذا أحتجتله يكون سندك ، إذا كل الناس تخلت عنك هو لأ ، إذا كل الناس فهمتك غلط هو لأ ، إذا كل الناس بعدت وسابتك هو لأ !! ” الضمان ” أحلى حاجة لما تكون ضامن الشخص ده ضمان مطلق ، ضامن أنه مش هيبعد عنك ، ضامن إنه مش هيزعل منك ، ضامن إنه مش هيفهمك غلط ، ضامن إنه سندك طول الوقت ، ضامن إنه ضهرك علطوول ، عمرك في لحظة ما تشك في إنه يسيبك ، عمرك في لحظة ما تشك إنه بيدور على غيرك ، عمرك ما تشك إنه بيخونك ، عمرك في لحظة ما تفكر إنه ممكن يمشي ، مجرد التفكير أصلا ميجيش في خيالك ، مجرد إنه وحش ميخطرش على بالك. ” الأمان ” والأجمل من كل حاجة إن الشخص ده يديك الأمان المطلق ، مهما حصل مش خايف تحكيله ، مهما كان مش متردد تشكيله ، بتحكيله عن كل شيء وأي شيء من غير خوف ، مش خايف من ردة فعله ، مش خايف يفهمك غلط ، مديك حرية الكلام ، مديك حرية الفضفضة ، عمرك ما خفت وأنت بتقله حاجة ، عمرك ما شكيت إنه هيزعل منك ، لدرجة إن لو إحساسك بدأ يتغير تجاهه لاي سبب تجري عليه وتترمي ف حضنه وتقوله أنا خايف من مشاعري ناحيتك ، أنا مش عايز أمشي وأسيبك ، أنا مش عايز أبعد عنك ، أنت كل حياتي ، مش عايز أحس بأي شيء وحش ناحيتك ، أنت حبيبي وأنا بحبك وهفضل أحبك. “حافظ عليه ” لو الأنسان ده موجود ف حياتك ، حافظ عليه ، خليك جنبه ، متفهمش خوفه عليك غلط ، متفهمش غيرته عليك غلط ، متفهمش أي حاجة بيعملها غلط ، لإنه أكيد أكيد مش بيكون بيعمل حاجة غير عشان بيحبك ، لو حسيت إنه غلط فيك سامحه ، لو حسيت إنه زعلان منك صالحه ، لو حسيت إنه مضايق منك خفف عنه ، لو حسيت إنه محتاجلك أترمي ف حضنه ، عشان الإنسان ده مش هيتكرر تاني ف حياتك ، فمتفقدوش مهما حصل ، ممكن تلاقي حد يحبك تاني ، لكن صدقني مش هتلاقي حد يحبك زيه ، ولو مش موجود أدعي ربنا يرزقك بواحد زيه عشان فعلا الحياة بيختلف طعمها مية ف المية لما يكون ف حياتك. ربنا يرزقكم من يحبكم الحب المطلق ، ويديكم الأمان المطلق ، وتضمنوه الضمان المطلق !!